Ақсу

Не деген сансыз дария
Ағысы атан үркітер!
Таулардың іші бәрі ұя,
Шаңқылдап жүрген бүркіттер.
Кездесті Ақсу көлденең,
Толқыны зілді батпандай,
Өңшең бір асау көк дөнен
Шайнасып шарт-шұрт жатқандай.
Мөңкіген жерде тұяқтан
Зуылдап оттар ұшқандай.
Қарасаң тұрып бұ жақтан
Өзен бір жалын құсқандай.
Ойладым сонда: Ілияс
Ақсуды өскен, мекендеп,
Қайран да ақын өртке ұқсас
Өзіне-ақ тартқан екен деп!

---