Жігіт ақын

(Сұлтанмахмұтқа)

Жомарт қой біздің бұл халық
Тілеуін ақтан тілеген,
Келеді бір-бір ұлды алып
Еңсесі көкті тіреген.
Туғызар талай еркін ел,
Жолаушы жолын суытпас.
Келешек бәрін келтірер,
Берешек дала ұмытпас!
Жырлады әсем солай бір
Халқының асыл мұратын.
Сұлтанмахмұт Торайғыр
Немересі — ұлы ақын.
Жиырма сегіз жасында
Тағдыр ажал тап қылған.
Жиырма сегіз ғасырға
Ол өлеңін лақтырған.
Ағып түсіп көгінен
Нажағай боп тас тіліп,
Қарар бүгін терімнен
Бір сүйкімді жас жігіт.
Ойлап, қиял жүгіртіп,
Сүйсінемін даңқына.
Ол мәңгілік жігіттік
Жасап кетті халқына!

---