Ғажайып бақ

(Қырымдағы ботаника бағы)

Осында бәрі жиылған
Әлемдегі ағаш әулеті.
Әкелген не бір қиырдан
Анамыз жердің дәулеті.
Өрнегін оның оюлап,
Қайталап шықпас еш шебер.
Осындай әсем қою бақ
Бәрінде жердің өссе егер, —
Деген бір іште тәтті арман
Кетеді соны көргенде
Қия алмай кісі аттанған
Қарайлап ылғи сол жерге.
Бірінің атын атасаң,
Соқпайсың қалай біріне.
Бәрін де атап ешқашан
Үлгірмес кісі тіріде.
Қара да қара тағы да,
Қара да іштей тыншы құр.
Маңдайда көзің барына
Етесің сонда мың шүкір.
Бәрі де достық қойнында,
Жарастық неткен мұнша көп.
Оралар тілек ойыңа
Адамзат солай тұрса деп!

---