Аэропортта

Бүгін менің жиі өзгерді реңім,
Бүгін менің жиі соқты жүрегім...
Жаңа ғана жайбарақат тұр еді,
Ақ самолет көз алдымда түледі.
Қара аспанға ақ самолет — айгезбе —
Ырғып шықты көрінбестей жай көзге.
Байқап қалдым лып-лып еткен шамын бір,
Жұлдыздардың арасынан шалынды.
Бүгін тіпті көтерілді тым биік,
Байқаса игі,
Алды неткен тұңғиық...
Зымырандар енген сайын ішкері,
Оған тура жол нұсқар ма —
Құсжолы?..
Соңдарына із қалдырып жолақты,
Күндегіден жұлдыздар да көп ақты.
Аққан жұлдыз көктей өтіп ғаламды,
Жүрегіме ине болып қадалды.
Қапияда жұлдыздар мен самолет
Ұшырасып қап жүрмесе жарар ед!
...Тұңғиыққа шашыраған ұшқындар,
Бүгін неге жиі-жиі ұштыңдар?!

1986 ж.

---