Күзгі бақ

(Әні бар)

Келіп ем күзгі баққа мен,
Нуларымды іздеп шулаған.
Оқымақ болып жатқа өлең —
Шумағымды іздеп тумаған.
Жадырап қабақ ашпады,
Тарқапты бақтың базары.
Көз жасын сілкіп тастады,
Шыбықтың сынып назары.
Қарсы алды терек аһылап —
Жігіт пе дерсің сөзге азған.
Жел жұлған көгіс жапырақ —
Үміт-көгершін көз жазған.
Мәжнүн тал тұр жүз жылап,
Ызғырық соқса тастарға.
Қанатын жайып күзгі бақ,
Кетердей ұшып аспанға.
Абыржып тұрған жайым бар _
Таптырмай ізін ән шағым.
Мұңайып қалды қайындар —
Сипап ем салқын саусағын.
Жөнелген іздеп көктемді —
Бұлбұлдар салған қыршын ән.
Еске сап өткен-кеткенді
Шығады үн қайдан сыңсыған?
Жаз өтті.
Мен де бастықтым.
Табатын байыз соқты сәт —
Жапырақ жатыр,
Жастықтың
Өртінен қалған шоқ құсап...