Ағайынға жағынба

Ағайынға жағынба,
Жалбарынып, жалынба.
Бағаң сенің бес тиын,
Отырмасаң тағыңда.
Егер тағың болмаса,
Тайраңдама онда аса.
Ағайынға айтқан сөз –
Желмен ұшқан далбаса.
Жалғызбын деп мойыма,
Еш нәрсе алма ойыңа.
Өліміңе жиналар,
Келмесе де тойыңа.
Бұл өмірге тоқ пейлі
Болсын жандар көп мейлі.
О дүниеге мүлкінің
Бірін де алып кетпейді.
Күміс пенен алтынның
Біліп жатыр парқын кім?
Ай мен күндей жарқырап,
Аты қалар ақынның.

---