Қалта

Капиталы текут в карман.
Мне противны и те и эти
Все они – Класс грабительских банд.
Есенин

Елтіріден кісі өліп,
Даңғазамыз,
Түннен әйтеу іздейміз таңға маңыз.
Инвесторлар сөйлесе мадиықсып,
Үміт артып тағы да ...
Алданамыз.
Кеңес «дәурен» келмеске
Өткен, кеткен,
Түсті заман күттірген көптен,
Көктен.
Капиталист қолға алды қос тізгінді,
Ұнатпаса қағады
Өктем беттен.
Кіріптарлық сананы
Отарлады,
Кедейге де «мүсіркеп» шот арнады.
Жұмысшы тап сілкініп,
Дзот жапқан,
Кеудесімен тоқтатты
Отарбаны.
Ағылшындар долларын пұлдай алар,
Қазақстан несие тынбай алар.
Траншпен әр қилы валюта ағып,
Немереміз
Құтылмас құн байланар.
Табиғаттың байлығы –
Тынбай ма олар,
Шөбереміз сұраусыз құлға айналар.
Қалта толып көрмеген
Ақшаға әсте –
О бір бәле,
Белгісіз кім бай болар?
Бар дәулетті беліне кім байланар?
Атан жілік кісілер
Аңырады,
Жаратқанның пейілі тарынады.
Алақанға түкірген әлдекімнің,
Тиіп жүр ме жұртыма бар ылаңы?
Халық отыр қарайып,
Қандарына,
Өзін қорғар сенбейді заң барына.
... Қоғам кетіп барады қыза бөртіп,
«Ұрлық қалта» тігіп ап шалбарына.
***
Алматының көшесінен
Есе алдым,
Алматының көшесінде
Өсе алдым.
Казиноның короліне
Айналып,
Саунасында көп мәселе шеше алдым.
Білді мені содырлары
Орданың,
Үйім еді – қара тұйық орманым.
Бильярдтық залдарымды тастадым,
Бағымнан да болып шықты
Сор қалың.
Бір стақан
Ішіп алдым вискиден,
Нәр сызбап ем
Шайдан кейін түскі үйден.
Ағып келед қара жолдың бойымен
Ақ «Мерседес»,
... Әлем-жәлем іш күйген.
Көңіліме
Опа бермей салабаң,
Апыл-ғұпыл мен аттандым
Қаладан.
Қара бұлттай түйілген кеп қайғымды,
Сейілте алмас
Дәл осы сәт
Жан адам.
Құлашымды заңғар көкке қағып ем,
Ұшырадым не бәлеге тағы мен?
... Қапшағайға қарап тұрып,
Тесіліп,
Пистолетті
Атып ұрдым қабымен.

---