Кім дейсің

Ел үшін еңбек еткенді
Құл деп қорлау бұл қай қылық?!
Сол құлдың еңбегі емес пе
Төрт құбылаңды сай қылып,
Отырған сені бай қылып.
Өзің тонап алдын да,
Жібердің шетел асырып,
Құл жасап берген байлықтың
Қалғаны жатыр шашылып.
Шікірейіп келгенге
Есігің айқара ашылып.
Билеп-төстеп өзіңді
Қулығын отыр асырып.
От, суыңа да ие боп
Берекеңді әбден қашырып.
Еңбек ері деп өзің,
Жырлаған кеше Шамшырақ.
От басында ой басып
Қалып отыр сансырап.
Құл деп оны қорлайсың,
Өрекпіп тіпті қоймайсың.
Жатып ішкен наданның,
Айтқаны шын деп ойлайсың.
Төркінін сөздің білмейсің,
Әкең, ағаңды құл дейсің.
Ел қамын ойлар ақын-ау
Халқыңды ертең кім дейсің?

---