Ей, бейшара!..

Ей, бейшара, танымасаң кісіні,
Мен боламын жолбарыстың күшігі.
Сен боласың салпаң құлақ есектің
Арам қанды, адам тектес пішіні.
Мен емеспін сеніменен еншілес,
Саудагерсің сұмпайымен көршілес.
Тор тоқымай тұра алмайды өрмекші,
Боқ шоқымай қарға көңілі көншімес.
Құс баласы ұясында жатады аз,
Қаңқылдаумен күн өткізер ата қаз.
Көкке ұшуға жазбаған соң жаратқан,
Көлшігінде малтығанға бақа мәз.

---