Қыздар

Топ гүл едік,
Бес үйдің бойжеткені.
Наз артып құрбыларға,
Жүретін сылаң қағып.
Дамыл таппай
Жүйіткитін ой-кептері,
Үміткер жігіттердің
Көзінен сыр аңғарып.
Өткір едік...
Айтыссақ, тіліміз – оқ,
Дөп тиер көздегенге
Кәнігі мергендей бір.
Көпшіл едік...
Қонақсыз күніміз жоқ,
Мәз болып қуанатын
Әкеміз келгендей бір.
От-жыр едік...
Әні едік бозбаланың
Арудың жанарынан
Шуақ ап, тойым еткен.
Шоқ гүлі едік...
Бозамық боз даланың,
Болатын несібесі
Жігіттің қолы жеткен.
Сылқым басып,
Қыздардың керімі боп,
Жүргенмен шалқып бүгін
Көңілмен алып-ұшпа.
Кетеміз-ау,
Бес үйдің келіні боп,
Бірге өткен бұла күндер
Айналып сағынышқа...

1970 жыл

---