Кел, махаббат!

Жанарымды арбамай
Сағым болып,
Сорым емес,
Жанатын бағым болып,
Жүрегімді өрте де
Жалын болып,
Кел, махаббат,
Арайлы таңым болып!
Мен өзіңмен
Сырласып күн кешемін,
Мен өзің боп
Өмірмен тілдесемін.
Сен болмасаң
Жүрегім тасқа айналып
Мейірімнің де не екенін
Білмес едім,
Ешкімді де
Елжірей сүймес едім...
От сезімге
Қашан да жүрегім бай,
Сүйсем егер
Қалтқысыз сүйем құлай.
Шын сүюдің
Азабын,
Ләззатын
Сен арқылы сезіндім,
Киелім-ай!
Жанарымды
Тек саған бұрам дәйім,
Өзге ешкімнен
Шапағат сұрамайын.
Жарылқа өзің,
Жарылқай алсаң егер,
Ей, махаббат,
Жәудір көз құралайым!
Дұшпаныңа қуаныш –
Құлағаның,
Шалып жығар
Тауып ап бір амалын.
Сүрінсең де,
Жығылмай
Тік тұрып кет!
Мерейімді үстем қып
Қуанайын.
Сенің үшін,
Тұп-тұнық арым үшін,
Жігерімді
Төзімге жаныдым шын...
Қиын сәтте
Дем берер жебеушім боп
Кел, махаббат,
Мәңгілік сағынышым!

---