Жаңа жыл алдындағы ойлар

Жан-дүниең бір күн сау,
Бір күн жүдеп...
Сағыныштан сыздай ма,
Шіркін, жүрек?!
Жаңа жылды
Жұп болып қарсы ала алмай,
Неге біздер бөліндік?
Былтыр бір ек...
Әкелетін көл-көсір далама құт,
Жаңа жылдан
Күтеді ел жаңа бақыт.
Мені есіңе аларсың!
Басқа қызбен
Қарсы алуға сен оны бара жатып...
Әсем сазды елітіп күйге демде,
Сол қызбенен
Дөңгелеп билегенде,
Мені есіңнен шығарып
Қалай ғана
Елжірейсің көңілің сүймегенге?
Білем, менсіз
Жабырқау мүлде кешің,
Еске алып
Сан мазасыз күйге енесің.
Өзіңді-өзің аямай
Менен безіп,
Қалай енді өзгеге үйленесің?
Махаббаттың
Сезінбей нарқын анық,
Кетіп едің...
Өзіңде бар кінә, ұқ!
Жүр ме екенсің
Сен әлде өкінбей-ақ,
Сезіміңнің кәусарын сарқып алып?..
Той-думанға
Құштар ғой жалпы халық,
Шат көңілдер
Тасқанда шалқып ағып.
Сезінерсің шынымен
Менсіз жерде
Қалатынын өмірің жартыланып...
Жанарыма бейкүнә бұлақ тұнып,
Қырық жамау жанымды құрап тұрып,
Бұл кеш мен де
Жандырып жүрегімді
Жаңа жылдан тілермін жылап тұрып:
– Сау басына орнатып қарадай түн,
Өзіне-өзі сеніммен қарамайтын,
Тірлік – күрес.
Тағдырға қарсы тұрып,
Өз бақытын қорғауға жарамайтын,
Жүрегінде өлтіріп ақ арманды,
Ғұмыр кешкен
Дәрменсіз адамдарды
Махаббат киесі ұрсын!!!
Шын сүюдің азабын сезінбейтін,
Ешкімді ойлап жүрегі езілмейтін,
Өзгелердің тағдыры неге керек,
Қиналмасам болғаны өзім дейтін,
Қанатынан қайырып ақ арманды,
Пәк сезімді қорлаған адамдарды
Махаббат киесі ұрсын!!!
Жоғары ұстап
Ар туын құлатпайтын,
Пәк сезімді
* * *
Үлбіретіп сезімнің гүл-желегін,
Шабытымның көрігін үрлеп едім.
Бірақ одан не таптым?
Жүз өлеңнен
Жүрегіңе жетпеді бір де өлеңім...
Сезімімді селдетіп төккенде мен,
(Өлең бе ол мақсатқа жеткермеген?)
Қос жүректің арасын жалғастырар
Таптырмайтын бірден-бір өткел деп ем.
... Үміттенген екенмін бекерге мен.
Үлкен сенім,
Ауыр жүк көтергенмен,
Бақытыма жеткізер
Баспалдақ боп
Бір жырымның қарымы өтелмеген...
Тағдырым деп
Жүргенмен сеніп, тегі,
(Көңіл хошы өзіңсіз келіп пе еді?)
Бір жырым да
Еселеп шаттығымды,
Бір жырым да
Қайғымды кемітпеді...
Сезім оты
Мол еді бұл жанымда,
Кінәлі өзім...
Жоқ, әлде жырларым ба?
Жауап таппай
Дал болып өз-өзімнен
Мұңға баттым,
Сән-сауық құрмадым да...
Тағдырыма демеймін кектенемін,
Қадіріме бұл күнде жеткен елім.
Бірақ саған
Барар жол таппаған соң,
Өлеңіме өлердей өкпеледім.
Мен осылай өлеңге өкпелі едім,
Сонда... жырсыз...
Қалай күн өткеремін?
Еркімнен тыс оралдым
Қайта бүгін,
Оралмасқа бел буып кеткен едім.

---