Шығыс сазы

Ей, мехрибаным,
Өзіңді сүйіп ұнаттым!
Ұнаттым сені,
Қарама маған сынап тым!
Сусаған сәтте
Шөліңді басар бұлақпын,
Адассаң жолда
Алдыңнан жанар шырақпын.
Ей, мехрибаным,
Өзіңді сүйіп ұнаттым!
Сыйладың бірақ
Қуаныш емес,
Таза мұң...
Әлі де қанша
Тартқызар маған азабың?..
“Аһ!” ұрып жатыр
Жүрегім мынау байғұсым,
Жаздырып маған
Ғашықтықтың тек ғазалын...
Ей, мехрибаным!
Сәуірдің сыйлап ақ таңын,
Кеудемнің неге
Көк мұзын қақыратпадың?
Шуаққа,
Шәрбат сезімге шөлдеп сендегі,
Жая алмай жүрмін
Жанымның жапырақтарын...

---