Ән

(аударма)

Қызыл Армияның Пруссия қақпасына келу құрметіне

Бұл ән жазылды
түнді бүркеніп,
таң шапағын аласұрып күткенде,
ақырғы дем біткенде,
қанға бөккен барабанның соңғы үніндей ышқынып,
бұл ән - үміт,
бұл ән - мәңгі сарқылмайтын күштілік!
Осынау ән өлімді де тоқтатқан;
ем де болған көкірекке оқ қатқан,
кеудедегі өксулерден,
жас құрғаған кезінде
үміт тастап сезімге,
бүкіл мына әлемдегі көздің жасы
құрыш күшке айналғанша бірігіп,
сүйтіп сәуле көрінгенше көкжиектер түріліп,
Адамзатты
осы ән ғана алып қалған ажалдан,
Жер жұтардай тажалдан.
Туысқандар,
көздің жасын тияр бүгін жетті күн,
көтеретін биік шыңға кек туын,
амал біткен шақтарды ұмыт, дәл қазір
тау жығардай екпінің.
Мәңгі қарлы асқарларға аспандай
біздер бүгін тік қарайық жасқанбай!
Тыңдаңыздар, тыңдаңыздар, батырлар,
белгісіздер, мұңдылар мен ақындар!
Тыңдаңыздар, гүл боп қалған мекендер,
дарға асылған партизандар - батылдар,
ақ бидайы қайта қаулап бүр атқан
Украина, тыңда сен де, хақың бар!
Тыңда, солдат, винтовка әлі ұстаған,
жау алдында қайыспаған сұсты адам,
ару қыздар, тыңдаңдар,
жаутаңдаған жетімектер,
жасқаншақтап тұрмаңдар,
Суворов пен Толстойдың,
Пушкиннің, Петрдің
рухтары, тыңдаңыздар,
Тыңдаңыздар, Күн, әлем,
бір жаңалық айтам бүгін мына мен:
мұндай шаттық кеудеге енді сыя ма,
қанат байлап ұшсам ба екен қияға –
өр айбынды біздің Қызыл Армия
(иә, иә, ол Біздікі, халықтыкі,
Жердікі!)
жетті Пруссияға!
Пруссия...
қанышерлер аналарды дарға асып,
көк шалғынды қан басып,
ойран салған қайран адал мекенге,
адамзаттың есінен бұл кетер ме?..
Олар енді өз жазасын тартады,
Мейірім мен адалдықтың
қатал заңы бар тағы:
әділ үкім кесу үшін зұлымдықтың бәріне
жиналады ертең енді жас сәби де, кәрі де!
Чехтар менен словактар, тыңдаңдар,
әзірлеңдер айыр, қысқыш, балтаны –
жендет оны жұтсын ертең қақалып
кеңірдектен қан тамып!
Француздық еңбеккерлер, шыдаңдар,
тартады енді сазайларын бұл аңдар!
Испандағы ыза-кекке шыныққан
оқтарыңды дайындаңдар, қырандар!
Себебі, әне, көрдің бе,
Пруссия қақпасында
найзағайдың жарқылын,
бұл найзағай талқан қылып зар түнін,
атар таңның алдындағы алау боп,
қадалады биіктерге жалау боп!
Жазалауға дір етпестен қолдарың,
зұлымдықты мүсіркесең - сорладың.
Ойланбаңдар, жау да, дос та байқалды,
Кешірмеңдер, кешірмеңдер
күні кеше уын шашқан
сарыбас жылан-сайқалды,
Россия аспанынан таралған,
әуенінде аппақ үміт, бал арман,
кірпіш жар мен қақпаларды қақ жарып
өршілдіктің екпінімен жаралған.
Жер астынан көктем келді гүл атып,
түнектерді құлатып,
Пруссия қақпасына қараңдар,
қараңдар да күш жинаңдар, жарандар!
Испандықтар күдер үзген үміттен,
көз тігіп түр күдікпен,
Қару алып
жиһан кезген жігіттерін күтеді,
үміттерін күтеді.
Жер үстінде бір жаңа
күш келеді өрлеген,
бұрын әлем көрмеген.
Бұл ән туды естілмеген әуеннен,
мен ән менен күрестерге тәуелді ем,
сондықтан да біздің Қызыл Армия
Пруссия қақпасына енгенде,
сәуле шашып Күн түспеген жерлерге,
бұл әнімді айтпай тұра алмаймын,
жаңа өмірдің әуеніне
ілесіңдер сендер де!

ПАБЛО НЕРУДА

---