Өлең, жыр, ақындар

Тоналу

  • 08.06.2022
  • 0
  • 0
  • 522
Ешкiм әлi тоналған жоқ дәл мендей.
Бiттiм әбден,
дiңкем құрып өлердей.
Арғы-бергi дүниеде,
сенсеңдер,
ешкiм әлi тоналған жоқ дәл мендей.
Өзiмдi өзiм –
теңеушi едiм алауға,
Өзiмдi өзiм –
теңеушi едiм жалауға.
Ар-ұятсыз әлдекiмдер келдi де
түстiм сұмдық тонау менен талауға.
Өшiрем деп сенiң дауыс,
үнiңдi,
Қырқамын деп тамырыңды,
түбiңдi,
көмейiмдi өңешiммен суырып,
тонап алды дiнiм менен тiлiмдi.
Қалдым қатып сор даладай қақталып,
қалдым жатып сор маңдайдай тапталып,
ән-жырымды тонап алды сонан соң
жаным менен жүрегiмдi ақтарып.
Еңсенi езiп,
еңкейттi де бойымды
тонап алды мерекемдi,
тойымды.
Тонап алды ақылымды,
санамды,
тонап алды сезiм менен ойымды.
Ең сұмдығы,
шырқыратып жанымды,
тонап алды кеудемдегi шамымды, –
Содан берi бiлмей жүрмiн, –
сенделiп, –
жүре-тұғын,
бара-тұғын жағымды.



Пікірлер (0)

Пікір қалдырыңыз

Ауру ағаш

  • 0
  • 0

Дерт тапқан ба –
қатерi бар жауыннан?!
Дерт тапқан ба –
қатерi бар дауылдан?!

Толық

Базарға барғым келмейді

  • 0
  • 0

Шолпан, қинама! –
Сен, сенбе,
Сен мейлі,
Менің базарға

Толық

Бүгінгі қазақ кедейі

  • 0
  • 0

Кеудесi қан,
Жұтқаны шаң,
Отызда шал,
Қырықта сал,

Толық

Қарап көріңіз

Басқа да жазбалар