Өмір деген осы

Каспийдің
Құмдақ жағалауында
Еңгезердей екі жігіт
Еңгезердей бір жігітті
Сабап жатты.
Жұрт біткен
Зорлық-зомбылықты емес
Цирк көргендей
Аңтарылып қарап қапты.
( Мұндайға мен деген
Ежелден әзір-ақпын)
Шыдай алмастан
Байғұс жігітті
Ұрып-соғудан
Ажыраттым.
Екеуі
“Жемтігін” тастай сап
Маған ұмтылды.
“Ой-ой” деген дауысым
Қылқынды.
“Қой-қой” деген дауысым
Қырқылды...
Енді бір қарасам:
Жаңа ғана
Мен араша түсіп
Таяқ жеп жатқан
Әлгі жігіт –
Өші кеткендей өршеленіп!—
Мені
Таспен соққаны!
Орнымнан есеңгіреп
Енді тұра бергенде
Баспен соққаны...
Мен араша түскен
Сол бір жігіт
Өзін сабаған
Екеуінен асырып
Бетімнен періп жатты.
Жығылып қалған мені
Бас-көзіме қарамай
Теуіп жатты...
Өмір деген осы...

---