Ұшып келем

Мезгілі еді нақ түстің
Күн күледі үстімде,
Ұшып келем «Аққұстың»
Қанатының үстінде!
Көкте түбіт түткендей
Аппақ бұлттар ауылы
Аунақшиды, өткендей
Үстінен көк дауылы.
Ақ бұлттардың ауылын
Көктей өтіп мен келем,
Басқандай көк дауылын
Көкейіме келді өлең.
Жатты Эльбрус биігі
Аяғымның астында,
Менен төмен иығы,
Ұштым одан астым да.
Қалды алдында көзімнің
Таудың талай бөктері,
Сонда өзімді сезіндім
Космонавттай көктегі.

---