Сарабдалым Мұхтарым

Самғаған қырандар мен сұңқар ғана,
Саңлағын сағынғанда іңкәр дала
Шомылып Шыңғыс таудың самалына,
Түледің тал бесіктен Мұхтар дана.

Қайырмасы:
Айдын шалқар пайымы
Шежіремнің шәйірі
Таң маңдайлым арайлым
Мұрагері Абайдың
Сарқылмайтын күш-дарын
Мәңгі қосып өлеңге
«Қазақпын» – деп әлемге
Сенсің ұран тұтарым,
Сарабдалым Мұхтарым

Айқындап айбыныңды, ғажабыңды,
Ақтардың шежірені саз ағынды
Абайдың айдынында алға жүзіп,
Әлемге әйгіледің қазағымды.

Қайырмасы

Егемен ел атандық ірі мығым,
Есейді қол бастады інің, ұлың.
Ертеңге бара жатыр ер есімің,
Жалғасып ұлылыққа ұлылығың.

Қайырмасы

---