Суы осы нұраның

Шахтер нұсқап бір үйді
Кетті өзі бастап-ақ.
Көп екен өр, ылдиы,
Шамасы он баспалдақ.
Сатылар да сартылдап,
Өттік асу біз қанша.
Ашты есігін жарқылдап,
Шахтер жары Биғайша.
Алдымыздан ашылды
Бір есіктен бір есік.
Электр шам асулы,
Бөлмеде гүл тұр өсіп.
Батса керек жол қатты
Қалдым бір кез су сұрап.
Салқын суды саулатты
Кранды ағай бір бұрап.
Орнынан тез ол тұрып,
Деді:—«Шырақ, бұл ағаң.
Өз үйінде отырып,
Су ішеді Нұрадан».
1953

---