Интервью

Аудандық газетте жүрген кезім. Бір күні редакторым шақырып алып: "Енді санаулы күндерден кейін ауыл шаруашылығы қызметкерлерінің күні келеді. Осыған орай, "Достық" совхозының бір сауыншысымен тез арада бір интервью әзірле. Алдымен директоры Бердіқұл Сарбасовпен келісіп ал" деген бұйрық берді. Содан коммутатор арқылы үш жүз шақырым жердегі "Достық" совхозына телефонмен тілдесу қиынның қиыны болып тұрған кез еді. Сәтін салғанда Бердіекеңді орнынан таптым.

— Ағай, сіздің совхозға іссапармен барамын, ауылда боласыз ба? — деймін даусы бір үзіліп, бір естіліп тұрған Бердекеңе.

— Иә, құдай қаласа елдеміз ғой. Шаруаңызды айта беріңіз, — деді ол.

— Бір озат сауыншыңыздан интервью алуым керек.

— Интер... ол не нәрсе?

— Аға, интер емес интервью, қысқасы кездесіп өзімен сөйлескенім жөн.

— Иә, иә... әлгі қалай еді интер...интер... — дегенше дауыс үзіліп кетті де, қайта қосылды -ертең келесіз бе?

— Иә, иә...

— Жақсы күтеміз ендеше...

Бердекең тағы бірдеңелерді айтып жатыр бірі естілсе, бірі естілмейді. Ертеңіне таң елең-алаңда "Достық" қайдасың деп тартып кеттім. Күнделікті жұмыс басталып кеткен шақта совхоз орталығына жеттім. Кеңсеге кіре берісте алдымнан орта бойлы, көзі мөлдіреген, екі бұрым ғып өрген қолаң шашы тірсегін қаққан әдемі келіншек қарсы жолықты. Көз жанарымыз түйіскенде жымың еткендей болды. Қасынан өте беріп ем, иіссудың хош иісі мұрынға келді. Шаруашылық басшысы да мені күтіп отырғандай болды. Совхоздың соңғы мәліметтерін жан-жақты қағазға түсіріп қойыпты. Ұжымның қол жеткен табысы, алдағы міндеттері жайында нақпа-нақ әңгімелеп берді.

— Сіз озат сауыншымен интер.. әлгі қалай еді...

— Интервью.

— Иә, солай деген едіңіз, оған да адамымыз дайын, — деді де кнопкісін басып хатшысын шақырды, — қайда әлгі Айнамкөз, жаңа жылтыңдап осында жүр еді ғой..

Мен қағаздарымды жиыстырып, орнымнан көтерілгенше бағана есік алдында көрген келіншек кіріп келді.

— Ә...Айнамкөз, міне аудандық газеттен тілші ағаң да келіп қалды... Енді мал өрісте ғой, жеткен жетістігің жайында айтып, әлгі... не еді, интер... — деп совхоз басшысы Бердекең жымың-жымың етті.

— Айтқаныңыз есімде ағай, сіз интерви алады деп едіңіз, — деді Айнамкөз тақ-тақ етіп.

Бастықпен қоштасып, сиыр сауудың шебері Айнамкөздің әңгімесін тыңдап, қойын дәптерімді толтырдым.

Рахметімді айтып, әлі уақытым көп болғандықтан ауылдық кеңестің кеңсесіне соғып, жаңалықтар болса іле кетейін деп солай қарай бет түзедім. Айнамкөз де ере шықты. Өзінің шаруасымен жүрген шығар деп, оған мән беріп жатқан мен жоқпын. Ауылдық кеңестің төрағасы Мұхаммет Назаров мені көріп қуанып қалды. Бір сағаттан кейін кезекті сессияларының өтетінін айтып, қатысуымды өтінді. Үлкен кісінің сөзін жерге тастамай келісім бердім. Сыртқа шықсам Айнамкөз тұр.

— Сіз әлі жүрсіз бе, шаруаңыз бітті ме? — дедім. Үнсіз. Байқаймын, көңілі күпті, бірдеңе айтқысы кеп қиналып тұр.

— Ағай... — деді күмілжіңкіреп, — әлгі интер... ту, интервиді қашан аласыз, тездете алмайсыз ба?

Мен жыларымды не күлерімді білмей, дағдарып қалыппын. Содан асықпай түсіндіре бастадым. "Интервью дегеннің қазақшасы сұхбат құру, әңгімелесу, екеуміз бағана әңгімелестік, менің сұрақтарыма жауап бердіңіз интервью дегенің сол" — дедім.

— Уф, ағай, — деп Айнамкөз жадырап сала берді, бәрін бүлдіріп жүрген Бердекең екен ғой.

— Ой, ағай, — деді күлкісін әрең тыйып, — Кеше мені Бердекең шақыртып алып: -Аудандық газеттен тілші келгелі жатыр. Озат сауыншы ретінде әлгі айтқан интерви бересіз, — деді.

— Интерви деген не ағай, сонда мен не істеуім керек? — деп сұрадым.

— Соны мен де білмеймін, — деді Бердекең, содан кете беріп едім, қайта шақырып алып айтқаны:

— Жаңағы интер... деген бәлені мен де білмедім. Бірақ жуынып-шайынып, жаңа киімдеріңді киіп, дайын боларсың...

Мәселенің мәнін енді түсінген мен де Айнамкөзге қосыла күлдім.