Білімге құштар студенттерге шәкіртақы.

БІЛІМГЕ ҚҰШТАР СТУДЕНТТЕРГЕ ШӘКІРТАҚЫ.

         Әл Фараби атындағы Қазақ Ұлттық университеті, Тарих факультетінде 23 қараша 2024 жылы Тұраш Қабжанқызы атындағы атаулы шәкіртақыны табыстау  рәсімі өтті. Бұл шара білімге құштар жастарды қолдау, олардың оқу үлгерімін ынталандыру және қоғамның дамуына қосқан үлесін мойындау мақсатында ұйымдастырылды. Шәкіртақы Тұраш Қабжанқызының білім мен ғылымға қосқан зор үлесін мәңгі есте сақтау және дарынды жастарды қолдау мақсатында тағайындалған.  Шараға білім ордасының басшылығы, оқытушылар, студенттер және Қабжанов отбасының өкілдері қатысты. Рәсім барысында Тұраш Қабжанқызының өмір жолы, оның білім саласындағы еңбектері мен өнегелі тұлғалық қасиеттері туралы естеліктер айтылды. 

      Атаулы шәкіртақыға ие болған студенттер ерекше жетістіктерімен көзге түскен жастардың қатарынан болды. Олар оқу озаттығы, ғылыми зерттеулердегі белсенділігі мен қоғамдық жұмыстарға атсалысқаны үшін марапатталды. Шәкіртақы дарынды жастарды ынталандырумен қатар, қоғамдағы білімнің құндылығын арттыруға бағытталған маңызды бастама екені сөзсіз. Тұраш Қабжанқызы – өмірін білім мен ғылымға арнаған тұлға. Ол өзінің еңбегімен көптеген адамдарға үлгі болды. Оның атындағы шәкіртақыны тағайындау – болашақ ұрпақты қолдауға, олардың кәсіби дамуына сеп болуға бағытталған игі бастама. 

        Білім – кез келген қоғамның ілгері жылжуының негізі. Қазіргі студенттеріміз – ертеңгі кәсіби мамандар, көшбасшылар, жаңашылдар. Бүгінгі шәкіртақы иегерлері – өздерінің тынымсыз еңбегімен, жоғары үлгерімімен және білімге деген құштарлығымен ерекшеленген жастар.  Шәкіртақы студенттерге жаңа мүмкіндіктердің есігін ашып, өз мақсаттарыңызға жетуге көмектеседі деп сенеміз. Бұл марапат тек білім алуға ғана емес, сонымен қатар үлкен жауапкершілікпен өз болашақтарыңызды құруға өз септігін тигізеді деп айта аламыз.