Алаш өсиеті — азаттықтың айқын жолы

«Алаш» дегенде — ұлт тағдыры, азаттық рухы, еркін ел болуға ұмтылған қазақ зиялыларының қайсар мұраты ойға оралады. Алаштың өсиеті — бір ғана тарихи кезеңнің емес, тұтас ұлттың болашаққа жол сілтер темірқазығы.

XX ғасырдың басы — қазақ елі үшін ояну мен серпілу дәуірі болды. Осы кезеңде тарих сахнасына Алаш зиялылары — Ахмет Байтұрсынұлы, Әлихан Бөкейхан, Міржақып Дулатұлы бастаған біртуар азаматтар шықты. Олар қазақ халқының тәуелсіз ел болуына ұмтылды, білім мен ғылымды басты құндылық деп білді. Алаш идеясы — тек саяси күрес емес, рухани жаңғырудың, ұлттық сананың оянуының бастамасы еді.

Алаштың аманаты не еді?

Алаш қайраткерлері елге үш басты мұра қалдырды:

Тәуелсіздік, білім, бірлік.

1.    Тәуелсіздік — Алаш арыстарының басты арманы. Олар қазақтың жері мен елі тұтастай өз қолында болуы керек деп есептеді.

2.    Білім — ұлтты алға сүйрейтін басты күш деп білді. Сол себепті Ахмет Байтұрсынұлы: «Баланы ұлша тәрбиелесең – ұл, құлша тәрбиелесең – құл болады», – деп ұрпақ тәрбиесіне ерекше мән берді.

3.    Бірлік — Алаш зиялылары үшін ұлттық тұтастықтың негізі. Олар ру мен жүзге бөлінуді емес, бүкіл қазақты бір жұдырықтай жұмылуға шақырды.

Алаш өсиеті бүгін де өміршең.

Қазіргі Қазақстан — Алаш арман еткен Тәуелсіз мемлекеттің жалғасы. Бүгінгі таңда бізге қажеті — сол өсиетті ұмытпау, оны іске асыру.

Білімді болу, әділетті болу, мемлекетке адал қызмет ету — Алаш ұрпағына артылған үлкен жауапкершілік.

Цифрлы ғасырда Алаш аманатына адал болу дегеніміз — жалған ақпаратқа қарсы тұру, ұлттық мүддені қорғау, қазақ тілін, мәдениетін және тарихын дәріптеу. Әрбір жас ұрпақ осы жауапкершілікті сезініп өсуі тиіс. Себебі Алаштың аманаты — қағаз бетінде қалған сөз емес, жүрекпен қабылданатын мұрат.

Алаш — тарих емес, тірі рух. Ол бүгін де қазақ баласына бағыт-бағдар беріп отыр. Тәуелсіз елдің азаматы ретінде мен де Алаштың өсиетін өмірлік ұстаным ретінде қабылдаймын. Ол – ұлтқа қызмет ету, әділдік жолында күресу, білім мен парасатты серік ету.

Себебі ел болам десең – Алашты ұмытпа!

Әлеуметтік желілерде бөлісіңіз: