Әйел журналистер: нәзіктік пен батылдықтың үйлесімі

Журналистика — ақиқаттың айнасы, қоғамның үнін жеткізуші күш. Бұл салада ер мен әйелдің айырмасы жоқ сияқты көрінгенімен, шындығында нәзік жандылардың жолы әрдайым оңай болған емес. Әйел журналист болу — бір мезетте батылдық пен сезімталдықты, жауапкершілік пен төзімділікті қатар алып жүру деген сөз.

Бүгінгі қазақ журналистикасында әйелдер аз емес. Республикалық арналардан бастап, өңірлік басылымдарға дейін — нәзік болмыс иелерінің қолтаңбасы айқын сезіледі. Олар қоғамның нәзік қырын сезініп, адам тағдырын жүрекпен жеткізе біледі. Бірақ сол нәзіктік пен сезімталдықтың артында қаншама еңбек, күш-жігер, кейде тіпті өз қауіпсіздігін қатерге тігу бар екенін көпшілік біле бермейді.

Батыл жүрек иелері

Әйел журналистің бір күндік жұмысы — бір романға жүк болардай күрделі. Кейде ол табиғат апатының ортасында жүр, кейде қоғамдағы әділетсіздікпен бетпе-бет келеді. Сұхбат алғанда тек сұрақ қою емес, адамның жанын түсіну — әйел журналистердің басты күші. Сондықтан да нәзік жандылардың репортаждары жиі әсерлі, шынайы, жылы шығады.

Тәжірибелі тілшілердің арасында ерлермен қатар еңбек етіп жүрген арулар көп: тележурналист, редактор, продюсер, шеф-редактор, жүргізуші — бәрі де өз орнында қоғам үшін қызмет етіп жүр. Мысалы, ақпараттық соғыс дәуірінде әйел журналистер де алдыңғы шепте жүр — олар тек жаңалық таратпайды, адамдардың үмітін, елдің рухын жеткізеді

Кедергілер мен көзге көрінбейтін теңсіздік
Алайда, әйел журналистерге әлі де болса қоғам тарапынан сын көзқарастар кездеседі. Түнгі түсірілім, іссапар, саяси сұхбат сияқты жұмыстарда қауіп пен жауапкершілік жоғары. Бірақ осындай қиындықтарға қарамастан, олар өз кәсібіне адал қалып отыр.
Кейбір зерттеулерге сүйенсек, медиа саласында әйелдер көп болғанымен, басшылық қызметтерде әлі де ер адамдар басым. Бұл — нәзік жандылардың кәсіби өсу жолындағы ең басты кедергілердің бірі. Дегенмен соңғы жылдары Қазақстанда әйелдер медиа жетекшілер қатарына көбірек еніп, өз қабілетімен сенім мен сыйға ие болуда.

Әйелдің қаламы — жүректің үні

Әйел журналистикаға ерекше жылылық әкеледі. Олар көбіне адам тағдырын, қоғамдағы әлеуметтік мәселелерді, отбасылық құндылықтарды тереңірек зерттейді. Журналистикада нәзіктік — әлсіздік емес, керісінше адамдықты сақтаудың белгісі.

Кейде дәл сол әйелдердің жазған мақаласы бір отбасын аман сақтап қалады, бір адамды қорғауға себеп болады, бір әділетсіздікті әшкерелейді. Сондықтан әйелдің қаламы — қоғамдағы адамгершіліктің шамшырағы.

Бүгінгі журналистикада әйелдің үні айқын, бірақ оны есту үшін қоғамның құлағы ашық болуы керек. Нәзіктік пен батылдық — бір-біріне қайшы ұғым емес. Әйел журналистер соны дәлелдеп келеді: олар нәзік болғанымен — мықты, сезімтал болғанымен — табанды, ал ең бастысы — шындыққа адал.

Қазақ журналистикасы әйелдердің еңбегінсіз бүгінгі деңгейіне жете алмас еді. Өйткені, әйел — өмірдің, ал журналистика — шындықтың символы. Осы екі құндылық бірігіп, адамзатқа үміт пен рух береді.

Автор: Сархан Қазына Бауыржанқызы

Оқу орны:Тұран университеті

Жетекші:Әлміш Ж.Т