''Кітап оқу – рухани байлықтың кілті.''

Кітап – адамзаттың сан ғасырлық тәжірибесі мен даналығын сақтап келе жатқан құнды қазына. Тарихта «кітап – білім бұлағы» деген сөз бекер айтылмаған. Әлем дамыған сайын ақпарат көп, уақыт аз болғанымен, кітап оқудың маңызы ешқашан төмендеген емес. Қай дәуірде болмасын, оқыған, ізденген, білімге ұмтылған адам ғана биікке көтеріледі. Бұл мақалада кітап оқудың маңызын, оның адам дамуына тигізетін әсерін және жастардың кітапқа деген көзқарасын қарастырамыз.Кітап оқу адамның ой-өрісін кеңейтеді, сөздік қорын байытады, танымын арттырады. Кітап арқылы біз өзге адамдардың өмір тәжірибесін, түрлі мәдениеттер мен тарихи кезеңдерді біле аламыз. Әсіресе жасөспірімдер үшін кітап — тұлғалық қалыптасудың негізгі құралдарының бірі.Кітап оқу – тек ақпарат алу емес, ол – жан дүниеңді тәрбиелеу, өзіңмен сырласу, өмірді тереңірек түсіну. Жақсы кітапты оқу – ақылды адамның сырын
тыңдағанмен тең.Бүгінде смартфон мен интернет заманында жастардың көбі ақпаратты тез қабылдауға үйреніп қалған. Алайда әлеуметтік желіден келетін қысқа, үстірт ақпараттар терең ойлауға мүмкіндік бермейді. Ал кітап – адамның назарын бір нүктеге жинап, терең ойлануға, талдау жасауға баулиды. Электронды құрылғылар көзді шаршатса, қағаз кітап керісінше – тыныштық пен шынайы ләззат сыйлайды.Қазіргі таңда жастар арасында кітап оқуға деген қызығушылық азайып бара жатқаны байқалады. Бұған себеп – гаджеттерге тәуелділік, бос уақыттың көп бөлігін әлеуметтік желіде өткізу. Алайда бұл жағдайды өзгертуге болады. Егер мектепте, отбасында дұрыс бағыт-бағдар берілсе, жастардың кітапқа деген қызығушылығы оянады. Қызықты шығармалар, заманауи әдебиеттерді насихаттау – жақсы бастама болар еді.
Егер біз күнделікті осы ұстанымды ұстасақ:
Күніне кемінде 15-20 минут кітап оқуға уақыт бөлу;
Телефонды шетке қойып, тыныш ортада оқу;
Қызықты жанрларды таңдау (мысалы, детектив, фантастика, мотивациялық кітаптар);
Оқыған кітабың туралы дос-жарандарыңмен пікір алмасу;
Кітапханаға жиі барып тұру,біздің кітапқа деген сүйіспеншілігіміз артар еді.
Кітап оқу – тек білім алу құралы емес, ол – рухани байлықтың, терең ойдың, жан тыныштығының кілті. Ақылды адамдардың артында кітапқа деген махаббат тұрады. Бүгінгі буын кітапты серік етсе, ертеңгі күні саналы, ізденімпаз, жауапты азаматқа айналары сөзсіз. Сондықтан әрбір жас кітапты досындай көріп, одан рухани нәр алып отырса – қоғамның болашағы жарқын болмақ.

Әлеуметтік желілерде бөлісіңіз: