Үштаған

Ошақта үш бұт құлатпай қазан ұстаған,
Үш найза шаншып шатыр да құрған үш бабам,
Үлгінің бірі ескіден қалған үштаған!
***
Үштаған жырдың үйрегі бейуақ ұшпаған,
Бүйірін түрткен ұшқырын ойдың қыспаған,
Күркеден бастап, пирамидаға да ұқсаған!
***
Көз майын таусып үштаған сызған күшті адам,
Жаңалық ашып, жалпыға жолды нұсқаған,
Ойланып көрсең, шынында ғажап үштаған!
***
Үштаған жырмен мен де бір қызық бастадым,
Сызды екен алғаш үштаған бейне тасқа кім?
Ұшында жұмбақ түйіскен мәңгі қас – қағым?!
***
Адамзат кейде секілді үлкен жанды ауыз,
Жан-жағын жайпап, опырып жұтқан жалмауыз,
Жемейтін ауыз болса да, демейтін сірә бар ма
ауыз?!
***
Ей, жолаушы, қайда асықтың, нені іздеп ?
Өткендердің айтқаны бар негіздеп,
Сабырмен кеш, өмір түпсіз теңіз деп!
***
Тобыр бөлек, шоқ жұлдыз, шоғыр бөлек,
Жолы да ерек, ұғынсаң жөні бөлек,
Қилы-қилы сыр шертер өмір дерек.
***
Өтеді-ау деп күн артынан күн жылжып,
Өзіңді өзің мүжи берме, тым жүнжіп,
Ешкімге өмір берілмеген мың жылдық!
***
Ауыз деген бір жалмауыз,
Ашынғанда не демейді,
Ашыққанда не жемейді?

---