Өлең, жыр, ақындар

Бола бермес үнемі көздегенің

  • 22.09.2021
  • 0
  • 0
  • 1096
Бола бермес үнемі көздегенің,
Өмір әр кез істетер өз дегенін:
Кенеп болып шығады –
Қамқа десең,
Жібек болып шығады –
Бөз дегенің.
Өкініп те,
Көресің көпіріп те,
Жетіліп те,
Көресің кетіліп те.
Көз алдыңда тұрғанға сенбейсің де,
Бас шұлғисың қисынсыз өтірікке.
Алды-артыңды осылай аңдай алмай,
Өзіңді-өзің боласың алдағандай.
Сенбегенің сенімді,
Ал сенгенің
Сатқын болып шығады әлдеқандай.
Бүгілмеске
Сондықтан бүгілесің,
Үңілмеске
Еріксіз үңілесің.
Бірде қатып қаласың қасарысып,
Бірде бордай босайсың,
Үгілесің...
Жаныңа өстіп ауыр жүк бөктересің,
Ыстықты да, суықты өткересің.
Жаза басқан сәттерің еске түссе,
Өзге түгіл, өзіңді жек көресің.
Өкінішің –
Өр болып ентіктірер.
Қателігің –
Ор болып мертіктірер.
Адам жанын түсіну – қиямет қой,
Қарбыз емес сыртынан шертіп білер!..

1976



Пікірлер (0)

Пікір қалдырыңыз

Сенің даусың шыққанда...

  • 0
  • 0

Бізге тағдыр әуелден жақсыларды қиған ба,
Артық бақыт қазақтың маңдайына сыйған ба?
Жәнібегім, қайтейін жетпеуші еді бір саған,
Жүзден озған жүйрікті мыңнан таңдап жиғанда!

Толық

Ақындарға үндеу

  • 0
  • 0

Күңіренгендей қаралы қабыр басы,
Қасіреттің тамады ауыр жасы.
Қабырғасы қапастың бүлк етпейді,
Қайысады халықтың қабырғасы.

Толық

Дүние

  • 0
  • 0

Қызыл тіл таңдайымда тақылдауда,
Сұм жалған жүрегімді зақымдауда.
Басымнан түйдек-түйдек бұлт көшкенде,
Жаныма домбырадан жақын бар ма?

Толық

Қарап көріңіз