Жастарға тілек

(Абай мен Шәкәрім кітаптарының тұсаукесерінде оқылған өлең)

Оқысаң ойға толы қалың кітап,
Рухың жасымайды, жаның жұтап.
Абай мен Шәкәрімді үлгі тұтып,
Жас ұрпақ, өмірден өз жолыңды тап.
Жырлары бағыт сілтер қос дананың,
Талқандап надандықтың тас қамалын.
Абай мен Шәкәрімді ұға алмасаң –
Сол болар ең үлкені масқараның.
Абай мен Шәкәрімше еліңді сүй,
Жұрт үшін керек болса жаныңды қи.
Халықтың қыз – ұяты, ұл – мияты,
Айныма адалдықтан, нәпсіңді тый.
Қайыр қыл, қолдан келсе жамағатқа,
Қалдырма ата-анаңды жаман атқа.
Алдымен арыңды ойла, қарынды емес,
Жүгінсін байлық, мансап қанағатқа.
Қазақтың қатар жүрген ұл мен қызы,
Елікпе, елірді деп жердің жүзі.
Аяқты анық бассаң адастырмас,
Абай мен Шәкәрімнің салған ізі.
Тайраңдап өте шықпа тасыр-тұсыр,
Әр сөзін көкірегіңе хатқа түсір.
Боласың сонда ғана нағыз адам,
Келмесе осы айтқаным бетке түкір...

---