Ішінен көрем бе деп топ қараның

Ішінен көрем бе деп топ қараның,
Көзімді көлегейлеп көп қарадым.
Сырымды айға айтамын айғайлаумен,
Жанымды жұлдыздарға ақтарамын.
Қара түн дірілдетіп берген демін,
Дидарын көре алмадым, шермендемін.
Бояуы бұлдыраңдап кетпей қойды
Көлбеңдеп көз алдымда көргендерім.
Бояуы көз алдымнан кетпей қойды,
Бірақ та даусым оған жетпей қойды.
Аңсаулы ауа толы Алматыда
Көз жасы ақ жаңбырдың кеппей қойды.
Сыбдырлап көл шетінде құрақ біткен,
Аққу-қаз қайда жүр деп сұрап біткен.
Күн шалқып жалғыз уыс ақ сәуледен,
Қаулайды қалың орман бір-ақ түптен.
Билейді көктем келсе көк терегім,
Көк терек тосады ылғи кептер елін.
Шексіздік шекараны қаламайды,
Табады тылсымдардан көп дерегін.
Бір ақ құс ұшады ылғи жүрегімнен,
Ғаламды іздейді ылғи нұр егілген.
Кеудемде жылтыраған жалғыз сәуле
Үміт боп мәңгі ғұмыр сүре білген.

---