Жыр күзетшісі

Бұл жерде Тарас қабірін 1883
жылдан 1933 жылға дейін күзеткен
Иван Ядловский жатыр.
(Құлпытастағы жазудан)
Күнін күткен аспандай,
Гүлін күткен даладай.
Қыранын күткен асқардан,
Ұланын күткен анадай.
Күтті ол ақын қабірін
Жарты ғасыр — елу жыл.
Беріп жастық жалынын,
Сөнді осында өмір бір.
Терін төгіп жауындай
Көз жасымен гүл екті.
Жатқан жеке қабірдей
Өзі жалғыз күнелтті.
Сақтап үнсіз сабырын,
Ішке тығып дауылын,
Күзетті ақын аруағын
Күзеткендей арманын.
Күзете алмас таулар да
Шыңын жазғы жасыннан.
Күзете алмас орман да
Гүлін жауын-шашыннан.
Қоштасып жас күндермен
Не күтті екен бұл кісі?
Қасиетіңді кім білген
О, құдіретті жыр күші.
О, өлеңнің құдайы,
Сен біздерге таныттың,
Жырға деген шынайы —
Махаббатын халықтың.

---