Біздің заң

Санаға білім нұрларын
Жинасақ күнде бәріміз,
Түсінсек өмір сырларын,—
Ол біздің өсу заңымыз.
Туған жер төсін зерттесек,
Алтыны қайсы, мыс қайсы,
Алмайтын қамал жоқ десек —
Дегізген өмір нұсқасы.
Адамзат билеп аспанды,
Айда да тұрса гербіміз,
Аударып тастап тастарды,
Құлпырта берсек жерді біз.
Көрінсе біздің күш көктен,
Көрінбек болса әлі де,
Осының бәрін істеткен —
Советтік өмір заңы де!
Адамзат жердің бетінде
Бақытын тапсын десек біз,
Арманын қуып жетуге
Қанатын қақсын десек біз.
«Соғысу» деген сұмдықты
Ұмытсын адам десек біз,
Жарқырап жерді күн мықты
Жылытсын әмән - десек біз.
Өмірде көбейт досыңды,
Достықсыз тірлік сәні не?
Айтқызған бізге осыны
Советтік өмір заңы де!
Адамның атын ардақтап,
Жұқтырмай оған кір, тозаң,
Келеді қорғап, нық сақтап,
Құдіреті күшті біздің заң.
Етеміз мақтан мұны біз,
Сүйеніп соған өсеміз.
Береке толы үйіміз,
Мереке толы көшеміз.
Осындай мықты, шат елмен,
Сүйсіне жасар жанымыз.
Күнде бір жеңіс әперген
Жасасын бақыт заңымыз!

---