Келді ол солай колхозға

1
— Апарып та салайын
Мына қырдың асты екен!
— Жоқ, өзім - ақ барайын.
Дала ауасы жақсы екен!
Бір дүр ете түсті де,
Машина кетті зымырап.
Көк майсаның үстінде
Жапырылған ізі қап.

2
— Сізбен бірге бір шопыр,
Келеді деп естіп ек.
Бөгеп бәлкім шаруасы
Шыққан шығар кешірек?! —
Деді колхоз бастығы
Қарсы ап тұрып қонағын.
Мал дәрігері — жас жігіт
Қақты үстінен жол шаңын.
Сәл аз ғана күлімдеп,
Бастыққа ол тұр қарап:
— Аз дейсіз бе бір күнге
Түпкілікті бір қонақ! —
Жайнап жүзі тұр жігіт,
Қарап қапты басекең...
Бір қозғалып қойды жұрт,
Деп, «әзілі жақсы екен!»
— Шопыр келер, болмаса,
Ол бәлдене бермес тым.
Жолдас, бастық, мен де онша.
Жаман шопыр емеспін!
Ду күлісті тұрған топ:
«Уа, іске сәт, іске» — деп.
Жатыр бастық: «тоқтау жоқ.
«Газик» пе, әлде «Зис» пе? — деп.
— Ал, ендеше тағы да
Қол тұрмасын, батыр, кел!
Алғашқысы дәрігерлік,
Шопырлыққа тағы әкел! —
Ду күлісті тұрған топ
Қошеметті пішінмен.
Көздерінде ойнап от
Бәрі риза ішінен.

Қазан, 1953 жыл

---