Ақ сұңқар

Серік Ақсұңқарұлына

Күлгенде күндей,
Күйгенде күлдей ақын жан,
Жыр-кеуде гүлдей,
Нәр алған алыс, жақыннан,
Найзағай ойнап,
Нөсердей құйған заматта,
Тақылдан аулақ,
Тақыр мен пақыр мақұлдан!
Сәуле іздеп көпке
Әуелеп көкке ақ сұңқар,
Жылытып жырмен,
Ызғарлы жерді, жақтың қар,
Бәлелі бетке,
Әуре боп текке кектенбей,
Алаштың жоғын,
Тынымсыз жоқтап, тарттың зар!
Балбалдай ғайып,
Бабалар өткен бұрын деп,
Күмілжіп жүрген,
Имене басып, күбірлеп,
Сарғайған ердің,
Сілкінтіп еді санасын,
Ипподромдағы
Тұлпарлар жыры дүбірлеп.
Тұлпарын түздің
Тізгіндеп, тізіп шетінен,
Шапқызып қойған,
Шеңбермен шектеп, ретімен,
Режимді көздеп,
Кежірлі сөзді жалындап,
Кезей бір тартып,
Кезеңді белден өтіп ең!
Зауалға батқан
Заманға қайнап зығырдан,
Ойыңның нәрін,
Уақытқа байлап зымыран,
Шырағын жақтың,
Жолына жұрттың шыр-пыр боп,
Шынжырын үзіп,
Шыға алмай жүрген шығырдан.
Өмірде бала,
Өлеңде дана, қанатын,
Қиындар өткен
Қияға ғана қағатын,
Ғасырдың ащы
Шындығы жайлы ашынып,
Өртене жырлап,
Өзінен өзі жанатын.
Ардақтап,ақын,
Ақ тілек сізге арнайды ел,
Тоқсанға дейін
Топшыңыз сынбай, талмай бел,
Алаштың арлы,
Өлеңі үшін аман-сау,
Ақ сұңқар ақын,
Аспанда қалқып, самғай бер!