Өмір деген бұтақты зор қарағай

Өмір деген бұтақты зор қарағай,
Асығады құшуға таңдағы арай.
Бір жапырақ тартады көкке қарай,
Бір жапырақ тартады жерге қарай!..
Бекінгені, белгісіз өкінгені,
(Тіршіліктің желге ұшар жетімдері).
Бір жапырақ бұрады бетін әрі,
Бір жапырақ береді бетін бері.
Ой орманын оңаша аралаймын,
Жазуға бір бауырын жаралы айдың.
Адамзаттың өмірі желге ұшатын
Жапырағына ұқсай ма қарағайдың?
Болашақтан күтемін даналық бір,
Қосатындай тірлікке жаңалық, түр.
Тыныс алып қойнында бабам жатқан
Қара жерден қарағай нәр алып тұр.
Өмір басқа әр түрлі салады ойлар,
Ашылғандай кеудемнен жаңа қайнар.
Тұғырдағы тұрғандай қыранға ұқсап
Қанат жайған жапырағы қарағайлар!

---