Дөңгеленіп алдымда тұршы, ғалам

Дөңгеленіп алдымда тұршы, ғалам,
Жарық сәуле, сүйеу боп жүрші маған.
Шаттығымды, қайғымды тілмен айтып,
Қандай бақыт, күле алам, күрсіне алам.
Жүрегімді ақтарып көрші бүгін.
Білдірмейді мұңымды өршіл үнім.
Көздеріңді көздерім сүйіп қалды,
Жан шуағын жаныңның берші, күнім.
Жан жылуы біреудің ұнаған сәт,
Махаббатты шынайы тұрам аңсап.
Сенімді дос керегін сездіреді
Қалықтаған, сүрініп құлаған сәт.
Шарықтаған шағымды ұқтыр, үнім,
Асқақ дауыс көмейден шықты бүгін.
Сүріндірмей келеді, сезіндіріп
Менің нәзік жүрегім мықтылығын.
Шарап іштім бақыттан. Шалқыдым сан,
Тілекші көп табынған. Қалқып ұшам.
Жалын болып жалынға қосыламын,
Жүректерде жарық боп шарпылысам.

---