Ұлыстың ұлы күні - Наурыз

22 Наурыз – көктемнің жаршысы, табиғаттың жаңаруы мен халықтың бірлігін бейнелейтін маңызды мереке.Бұл күнді түркі халықтары, соның ішінде қазақ халқы ерекше құрметпен атап өтеді. Наурыз – күн мен түннің теңесетін, қыс пен жаздың түйісетін сәті. Көне заманнан бері бұл мейрам береке мен молшылықтың, жаңа жылдың бастауы ретінде қабылданған. Қазақ халқы Наурызды "Ұлыстың ұлы күні" деп атаған.Бұл күні ағайын-туыс бір-біріне ізгі тілектерін білдіріп, ренжіскендер татуласып, үлкендер мен ақсақалдардан бата алады. Мерекенің өзіндік дәстүрлері мол. Ұлыстың ұлы күнінде наурыз көже дайындалып, келген қонақтарға ұсынылады. Наурыз көже – жеті түрлі тағамнан жасалатын дәстүрлі ас, ол молшылық пен тоқшылықтың символы.Наурыз мейрамын қазақ халқы үш күн қатарынан атап өтіп, ұлттық ойындар, жәрмеңкелер, концерттер ұйымдастырады. Ұлттық ойындардан жарыстар өткізіліп, ауыл азаматтары өз шеберліктерін көрсетеді.Бұл мейрам – елдегі ұлттардың татулығын көрсететін бейбітшілік мерекесі. Наурыз тек көктемнің келуі ғана емес, халықтың рухани жаңғыруы мен бірлігін нығайтатын маңызды мейрам. Сондықтан бұл күн әр отбасы үшін ерекше қуаныш пен берекенің бастауы болып саналады.