Нәпсі Әр-Рухи

Берік болып рух деген аманатқа,
Бөленейік бақытқа ана жақта.
Өлім деген теңізге жұтылғасын,
Отбасың қалады жаға жақта.

Адамзаттың марқаю көне заңы,
Өз нәпсімді жеңе алмай келем әлі.
Құдай бізді шақырса жұмағына,
Жаһаннамға қашады неге бәрі?

Жақұттарды жанымыз тақсын ізгі,
Көпшілігі ағысқа қарсы жүзді.
Кедергіден өтеміз ақырындап,
Басқара алсақ бойдағы нәпсімізді.

Өлшенбейді дәрежең дәулетіңмен,
Рухымыз тазарады тәубе етумен.
Құдай жазған тағдырға шағымдан ба,
Айырылсаң да сен тіпті бауыр етіңнен.

---