Жаңылтпаштар жинағы – 2-бет
Шарханның
Шақшадай басы шарадай болды.
Шалшыққа аунап,
Қара лай болды.
Үш ұшқыш ұшады,
Үш ұшқыш ұшса,
Үш құс та ұшады.
Ұшқыш ұша ма?
Үш құс ұша ма?
Алатауда аңғарлар бар,
Алатауда заңғарлар бар,
Аңдар заңғарларда ма,
Аңғарларда ма?
Қаршығаның қарашығының қарасынан,
Қарлығаштың қанатының қарасы қара ма?
Әлде қарлығаштың қарашығынан,
Қаршығаның қанаты қара ма?
Мен сенің сөзіңе сенгенім –
Мен сенің өзіңе сенгенім.
Сен менің сөзіме сенгенің –
Сен менің өзіме сенгенің.
Бақа батпақта ма?
Бақбақ батпақта ма?
Бақа бақта ма?
Бақбақ батпақта ма?
Серкені Серік ерте ме,
Серікті серке ерте ме?
Серке ерке ме,
Серік ерке ме?
Секіріп,
Жүгіріп,
Қарғып,
Ойнадық мақтаны қар ғып.
Бұзау, қозы, тай, лақ та,
Құлындар да, тайлақ та
Жүрген жаңа сай жақта.
Жең, жең емей, балақ па?!
Жылқылардың бәрі ат па?!
Ата-бабалардың
Барлығының тамы ақ па?
Ала сиыр, ала қарға
Жүр ғой, әне, ала қарда.
Қарқылдайды қара қарға
Жалпылдайды ала қарға.
Жесін биыл жазда
Біздің екі қазға
Бір қап тары аз ба?
Онда бос қап табайық,
Екі қабын алайық.
Ұлықбектің ұлы
Айта алмайды «Ұ»-ны,
Айта алмайды «Ү»-ні,
Айта алмайды «Ы»-ны.
Үйретем қалай мұны?!
Төбесіне қораның
Шығып кетті жеті ешкі.
Ал қораның төбесі
Әбден тозған, өте ескі,
Болғаннан соң өте ескі,
Құлап түсті жеті ешкі.
Қонып таңнан атына атам,
Жинап елден алты бақан,
Құрып берді алтыбақан.
Рақмет, алтын ата,
Жем берейін атыңа, ата!
Айгүл алдына айна алып,
Қарап отыр ойланып.
Гүлнар оның жанында
Жүгіріп жүр айналып.
Қайнағанда ән салатын
Секілді біздің құман.
Далада қатты жел тұрғанда,
Салады екен құм ән.
Уақытты жол алар,
Сонда да тез оралар.
Асықпаса ол тағы да,
Үйге бір күн қона алар?
Мініп атқа қара қасқа
Атам бүгін барады асқа.
Атаңды сен қарсы алғайсың
Жоқ қой үйде бала басқа.
Ойлап-ойлап бас қатты,
Мініп кетті-ау басқа атты.
Шабан ат қой жаман ат,
Қырдан әлі аспапты.
Адамға, заманға,
Ырзамын әманда.
Адамға қарайла,
Салма әсте табанға.
Алпысты алты деп айтысты,
Айтысты алты деп алпысты.
Алпыс алты емес алпыс екен,
Алты алпыс емес сәл кіші екен.
Өрліктің, Ерліктің талабы –
Елдіктің амалы.
Кеңдіктің өзіндей,
Қазақтың Адамы!
«Дауылыңа, жауыныңа,
Қарсы тұрып жетемін ауылыңа».
Деп едім бауырыма,
– Қосылыпсың, – деді,
– Батырлар қауымына.
Ақ домалақ, көк домалақ,
Көп домалақ жоқ болар-ақ.
Ақ домалақ көп домалақ,
Көп домалақ – көк домалақ.
Еменім, қарағайым,
Ақ қайың, дара қайың.
Ара алып аралайын,
Деп едім,
Ұрысты бар ағайын.
Кендірден кебек шығар,
Кенептен елек шығар.
Електен кебек шығар,
Кебек те керек шығар.
Ағаш кессе аралап,
Алар қолын жаралап.
Әрі салақ, әрі олақ
Бала болған жаман-ақ!
Қаймақты айырдым,
Тайлақты қайырдым.
Қаймағым май болды,
Тайлағым мал болды.
Базардан қауын алдым,
Қауынның дәуін алдым.
Қақ жарып дәнін алдым,
Бір тіліп дәмін алдым.
Тұлпардан тұлпар озбаса,
Сұңқардан сұңқар озбаса,
Тұлпардан сұңқар озбайды,
Сұңқардан тұлпар озбайды.
Құланнан құнан оза ма,
Құнаннан құлан оза ма?
Құнан да құлан сияқты,
Құлан да құнан сияқты,
Жібермес тұяқ тұяқты.
Алты жасар Ақан ғана
Ауылдағы сақау бала.
Таяқты да таяқ дейді,
Тарақты да таяқ дейді.
Қаймақты да қаймақ дейді,
Қармақты да қармақ дейді.
Тезек;
кесек-кесек тезек пе десек
Тезек – кесек кезек емес,
Майда тезек.
Мына палуан да өте ептi,
Ана палуан да одан көп ептi.
Ықсан ұста – ұстаз ұста,
Үш ұстаға ұстаз ұста.
Үш ұстаға тұстас ұста.
Тамшылап тамшы тамса,
Тығылар таса тапса.
Iске іскер,
Iстi
Iскер iстер.
Iзшiлер iздестi,
Түз кездi, iз кестi.
Мектепте ақ бор бар,
Көк бор бар,
Көп бор бар.
- Бенедикт Спиноза
- Ясунари Кавабата
- Мұстафа Шоқай
- Абай Құнанбайұлы
Барлық авторлар
Ілмек бойынша іздеу
Мақал-мәтелдер
Қазақша есімдердің тізімі