Ұйымның корпоративтік мәдениеті: ҚазҰУ тәжірибесі – құндылықтар мен даму үйлесімі

Бүгінгі таңда кез келген заманауи ұйымның табысты жұмыс істеуі тек технологиялық дамуға немесе материалдық ресурстарға ғана емес, сонымен қатар ұжым ішіндегі корпоративтік мәдениетке тікелей байланысты. Корпоративтік мәдениет – бұл тек сыртқы жарнамалық стиль немесе ұйымның миссиясы ғана емес, бұл – ішкі қатынастардың этикасы, ұйым мүшелерінің құндылықтық бірлігі, ортақ мақсатқа жетудегі ұжымдық сенім. Ұйымның корпоративтік мәдениеті оның ішкі құрылымын көрсететін маңызды құрал болып табылады және кез келген басқару жүйесінің тиімділігін арттыратын басты факторлардың бірі болып табылады. Осы тұрғыдан алғанда, әл-Фараби атындағы Қазақ ұлттық университеті елімізде жоғары оқу орындары арасындағы беделімен ғана емес, сонымен қатар ішкі мәдениетінің жоғары деңгейімен ерекшеленеді. ҚазҰУ – корпоративтік мәдениетті бірізділікпен қалыптастырып, оны жүйелі түрде дамытып келе жатқан заманауи білім ордасы.

ҚазҰУ-да басқару үрдісі формалды құрылымдармен ғана шектелмейді. Мұнда шешім қабылдау, жұмыс жүргізу, қарым-қатынас орнату – бәрі белгілі бір моральдық және кәсіби құндылықтарға негізделеді. Олар: академиялық адалдық, әділдік, жауапкершілік, креативтілік, ашықтық, әртүрлілікке құрмет және тұрақты даму идеясы. ҚазҰУ басшылығы мен оқу орнының барлық қызметкерлері бұл құндылықтарды жоғары деңгейде сақтауға және дамытуға ұмтылады. Мысалы, университет қабырғасында жүйелі түрде "Адалдық сағаттары", Sanaly urpaq, Адалдық алаңы сияқты жобалар аясында этика мен ашықтық тақырыптары қозғалады. Бұл жобалар студенттер мен қызметкерлердің құндылықтық ұстанымдарын қалыптастырып, оларды жоғары адамгершілік деңгейде тәрбиелеуге бағытталған.

Университет философиялық негізін әл-Фарабидің "Қайырымды қала" тұжырымдамасынан алады. Бұл модель бойынша, университет қоғамның моральдық негізін қалыптастыратын орталық ретінде қарастырылады. Яғни, білім тек кәсіби шеберлікке емес, сонымен бірге жоғары адамгершілік пен әлеуметтік жауапкершілікке үйретуі тиіс. Мұны университет өмірінен нақты байқауға болады. Студенттер еріктілік жобаларға қатысып, әлеуметтік мәселелерді шешуге белсенді атсалысады. Мысалы, ҚазҰУ студенттері әлеуметтік көмек көрсету, қоршаған ортаны қорғау, білім алудағы теңдік мәселелеріне қатысты бірқатар бастамаларды қолға алып, осы бағыттағы мәдени құндылықтарды студенттер арасында кеңінен насихаттайды. Бұл – университеттегі корпоративтік мәдениеттің нақты көрінісі болып табылады.

ҚазҰУ-да студенттер тек білім алушылар ғана емес, олар – университет қауымдастығының белсенді мүшелері. Мұнда әрбір студент өз пікірін білдіре алады, ұсыныс енгізе алады. Студенттік кеңестер, факультеттік өзін-өзі басқару ұйымдары, жастар ісі комитеттері университет мәдениетінің ажырамас бөлігі болып табылады. Басқару процесінде "төменнен жоғарыға" кері байланыс жүйесі жақсы жолға қойылған. Бұл қызметкерлер мен студенттердің университетті бірлесе дамытуға деген мотивациясын арттырады. Университеттің әлеуметтік өмірі, оның ішінде мәдени іс-шаралар мен ғылыми-конференциялар, студенттерді біріктіріп, жаңа бастамалар мен идеялардың тууына ықпал етеді.

ҚазҰУ – әртүрлі ұлттар мен мәдениет өкілдерін біріктіретін ашық алаң. Мұнда этностардың, діндердің, дүниетанымдардың әртүрлілігі – артықшылық ретінде қабылданады. Бұл атмосфера студенттердің толерантты, кең ойлы, интеркультуралық құзыретті тұлға ретінде қалыптасуына мүмкіндік береді. ҚазҰУ-да жүйелі түрде халықаралық форумдар, конференциялар, мәдени іс-шаралар өткізіліп тұрады. Мысалы, “Фараби әлемі” халықаралық конференциясында әлемнің түкпір-түкпірінен студенттер мен ғалымдар бас қосып, ашық ғылыми ортада идеялармен алмасады. Бұл іс-шаралар студенттердің әлемдік деңгейде қарым-қатынас жасау дағдыларын қалыптастырып, оларды жаһандық мәселелер мен инновациялар тұрғысынан ойлауға шабыттандырады.

ҚазҰУ – Қазақстандағы алғашқы экологиялық бағыттағы жоғары оқу орны. Университет аумағы экологиялық талаптарға сай жабдықталып, “Жасыл кампус” идеясы негізінде дамуда. Мұнда тек аумақты көгалдандыру емес, экологиялық ойлау жүйесін студенттер бойына сіңіру көзделген. Бұл бағыттағы нақты жетістіктердің бірі – жаңа экологиялық зертхана мен энергия үнемдеуші инфрақұрылымдардың іске қосылуы. Бұл тек университеттің материалдық жетістігі емес, оның ішкі мәдениетінің бір бөлігіне айналған. Университетте студенттер мен профессорлық-оқытушылық құрамның экологиялық тәрбиесі жоғары деңгейде, мұнда әрбір адам табиғатқа деген құрмет пен жауапкершілікті өз өмірінің бір бөлігі ретінде қабылдайды.

Корпоративтік мәдениет – университеттің беделін іштен нығайтатын негізгі құрал. ҚазҰУ-дың жетістіктері – халықаралық рейтингтерде үздік позициялар, академиялық ұтқырлық, түлектердің сұранысқа ие болуы – мұның барлығы университет ішіндегі жүйелі мәдениеттің нәтижесі болып табылады. ҚазҰУ білім саласындағы үздік нәтижелерге қол жеткізудің негізінде оның корпоративтік мәдениетінің күштілігі мен сабақтастығы жатыр. Университет тек білімді мамандарды даярлап қана қоймай, оларды қоғамның әлеуметтік, мәдени және рухани дамуына үлес қосуға бағыттайды.

ҚазҰУ-дың үлгі боларлық бастамалары: "University of the future" тұжырымдамасы – цифрлы трансформация мен адами капитал үйлесімі. “Рухани жаңғыру” аясындағы ұлттық тәрбие жобалары – мәдени мұра мен қазіргі трендтердің байланысы. "Жоғары мораль – жоғары сапа" қағидасы – сапаны ішкі моральмен қамтамасыз ету жолы. Осы принциптерді ұстана отырып, ҚазҰУ жаңа жетістіктерге жетіп, халықаралық білім беру кеңістігінде өзіндік орнын нығайтып келеді.

Мен ҚазҰУ студенті ретінде университеттің корпоративтік мәдениетін күнделікті өмірден көріп, сезіп келемін. Бұл тек сыртқы формалдылық емес, бұл – адамның ішкі дамуына ықпал ететін тірі жүйе. ҚазҰУ-да тек кәсібимаман емес, жауапты, адал, рухани бай тұлға қалыптасады. Корпоративтік мәдениет – бұл университеттің көрінбейтін"жүрегі". ҚазҰУ осы жүректі әл-Фараби даналығы, заманауи талаптар және ұлттық құндылықтармен үйлестіріпсоқтырып отыр. ҚазҰУ – білім ғана емес, мәдениет пен болашақтың мектебі.

Тленчиева Н.С.

педагогика ғылымдарының кандидаты

Байболов О.Б.

Электроника және басқару жүйелері

мамандығының магистранты

Әл-Фараби атындағы Қазақ Ұлттықуниверситеті

Әлеуметтік желілерде бөлісіңіз: