Әке тілегі

Ұлым менің ақ дидарлы ашық таң,
Кінәратсыз, кіршіксіз пәк көңілім.
Жолың ұзақ арман қусаң – асықпа,
Болу үшін мейманы бақ төрінің.
Сұлулық боп көрінбесін сылаң жай,
Тереңдерден тас танысаң – лағыл тұт.
Мен айтпаған әсем – әуен бір ән бар,
Сол ән сенен әуелесін тамылжып.
Ән әуенін тоқтатпа – ел тыңдасын,
Келер саған тыныстауға шаршаған.
Бар алдыңда қырмызы гүл бел жасыл,
Шырқауыңа шықсам деп мен аңсаған.
Самғай шарла, ал асуын талмай шың,
Толтыр шаттық кәусарымен шараңды.
Саған келер жамандықты жау алсын,
Бақыт құсы – болсын қонса – баянды!

---